Ancelotti: Nuk e pashë kurrë veten të eliminuar sepse në ‘Bernabeu’ gjithçka mund të ndodhë

Real Madridi ka arritur të kualifikohet në finalen e Kupës së Mbretit të martën pas një gjysmëfinaleje spektakolare kundër Real Sociedadit.

Ndeshja e kthimit në “Santiago Bernabeu” ka prodhuar plot tetë gola, duke përfunduar 4-4, çka i ka siguruar “Los Blancos” kalimin në finale me rezultatin e përgjithshëm 5-4.

Ishte një ndeshje emocionuese për tifozët neutralë, por për ata të Real Madridit kishte edhe arsye për shqetësim, pasi skuadra e tyre ka pësuar katër gola në shtëpi ndaj baskëve.

Sipas “Marca”-s, trajneri Carlo Ancelotti ka pranuar këtë problem përpara konferencës për shtyp, ndonëse e ka shijuar spektaklin e 120 minutave.

“Ishte një ndeshje argëtuese më shumë gabime, por edhe më shumë momente të mira. Ishte emocionuese. Jemi në finale dhe në fund ia dolëm të arrijmë objektivin tonë. Nuk e pashë kurrë veten të eliminuar, sepse në ‘Bernabeu’ gjithçka mund të ndodhë. Kur kemi nevojë për përmbysje, nuk dorëzohemi kurrë, sidomos në shtëpi, me tifozët tanë. Patëm pak fat të keq, Alaba preku dy herë topin në mënyrë të pafat. Këto janë gjëra që ndodhin. Por të pësosh 4 gola nuk është diçka e mirë. Ne shënuam 4, por nuk patëm ekuilibër. Jemi një ekip me pak ekuilibër, por me shumë forcë sulmuese. Shënuar katër herë ndaj Real Sociedad nuk është e lehtë”, ka thënë Ancelotti.