Aktakuzë ndaj pesë personave për krime lufte, dogjën viktima për së gjalli

Prokuroria Speciale e Republikës së Kosovës, ka ngritur aktakuzë në Gjykatën Themelore në Prishtinë, pranë Departamentit Special, kundër të pandehurve me inicialet D.C, D.N, M.SH, N.S dhe S.J. Për të pestit ekziston dyshimi i bazuar se gjatë luftës në regjionin e Gjilanit kanë marrë pjesë në vrasjen e tetë civileve shqiptarë, ku njëri nga ta është djegur për së gjalli.

Sipas Prokurorisë Speciale, të pandehurit  si pjesë e grupit kriminal, në bashkëkryerje edhe me pjesëtar tjerë të paidentifikuar të këtij grupi, të armatosur dhe të veshur me uniforma të kamufluara dhe uniforma jo të rregullta të policisë apo ushtrisë serbe, kanë marrë pjesë në vrasjen e tetë civileve shqiptarë, e konkretisht dy nga këto viktima i kanë vendosur në grumbull drunjësh, ku njëri nga ta është djegur për së gjalli, kishin rrahur, maltretuar, torturuar, plaçkitur, dëbuar popullatën civile shqiptare, veprime këto të sanksionuara sipas ligjeve vendore, zakoneve të luftës dhe Konventave Ndërkombëtare të Gjenevës dhe Protokolleve Shtesë.

Andaj, më këtë, në bashkëkryerje kanë kryer veprën penale, Krime Lufte Kundër Popullatës Civile.

Ndërkaq, sipas njoftimit nga Prokuroria Speciale për të pandehurit M.Sh dhe N.S., ekziston dyshimi i bazuar mirë, se gjatë zbatimit të urdhër kontrolleve, janë gjetur në pronësi dhe posedim armë, në kundërshtim me ligjin e zbatueshëm lidhur me armët, me çka të njëjtit kanë kryer veprën penale, Mbajtja në pronësi, kontroll ose posedim të paautorizuar të armëve, raporton rtk.