Sylvinho: S’luaj për një pikë, ja përse nuk e ftova Brojën

Trajneri i Kombëtares së Shqipërisë, braziliani Sylvinho, në një konferencë për medie, ka folur për dy sfidat e fundit të vlefshme për një vend mes më të mirave të kontinentit në “Gjermani 2024”.

Ai shpjegoi arsyen për mungesën e Armando Brojës si dhe analizoi pikat e forta të Moldavisë.

Për brazilianin llogaritë e pikëve, të cilat duhet për të kthyer ëndrrën në realitet nuk i përshtaten dhe se nuk i pëlqen futbolli pragmatist.

“Nuk mund të futemi në fushë duke bërë llogari. Në futboll askush nuk luan për një pikë pasi është e pamundur. Kemi përpara dy finale të vërteta, unë nuk luaj për një pike”, tha Sylvinho.

Më pasi ai analizoi edhe rivalen e parë, Moldavinë.

“Është ende në lojë na pret një ndeshje e vështirë. Kanë një ekip shtatlartë dhe në fushën e tyre nuk kanë humbur asnjë herë. Ata luajnë shumë mirë edhe me kundërsulme prandaj them se kanë armët e duhura për të na vendosur në vështirësi”, tha ai.

“Broja nuk u grumbullua pasi duhet t’i japim kohën e duhur që të rikuperohet. Ai sapo ka lënë një lëndim të gjatë pas dhe i duhet kohë për të luajtur rregullisht. Edhe me Chelsean nuk ka luajtur në katër ndeshjet e fundit”, pohoi Sylvinho.