Fitoi “Topin e Artë”, por Messi nuk është blerja më e mirë në Amerikë

Lionel Messi arriti të fitonte “Topin e Artë”, por ka marrë dhe zhgënjimin e parë në Amerikë.

Ylli i Inter Miami nuk arriti të fitonte çmimin e “debutuesit”, trofeun në Major League Soccer që rezervohet për “blerjen më të mirë të vitit”.

Argjentinasi u mposht nga sulmuesi grek i Atlanta United, Giorgos Giakoumakis, i cili u shpall fitues pas 17 golave të shënuar në këtë sezon.

Sipas njoftimit zyrtar të MLS çmimi është një “vlerësim për meritat e futbollistit më impaktin më të madh në kampionat gjatë sezonit të rregullt 2023”.

Leo humbi prej votave të trajnerëve. Drejtuesit e stolave preferuan me mbi 46% Giakoumakis, kundrejt 34% të votave për argjentinasin.

Messi u transferua në ligën amerikane vetëm gjatë muajit korrik dhe luajti ndeshjen e parë zyrtare vetëm në fundin e muajit gusht.

Ai nuk arriti të ndryshonte ecurinë e ekipit nga Florida, që mbeti jashtë fazës “Play Off”.