Vjen lajmi i madh për EURO 2024: Transport falas për tifozët

Ambasadori i Kampionatit Evropian “Euro 2024” dhe, njëkohësisht legjenda e Gjermanisë, Filip Lahm, ka njoftuar në kanalin e Federatës Gjermane të Futbollit se transporti publik në zonat ku do të mbahen ndeshjet do të jetë falas, çka do të kontribuojë në lehtësimin e udhëtimeve për mbështetësit e kombëtareve pjesëmarrëse.

“Kemi vendosur së bashku me organet drejtuese të turnet të ardhshëm madhor që do të mbahet në vendin tonë, se transporti publik do të jetë falas”, ka deklaruar ai, duke shtuar: “ Kjo skemë ka si qëllim lehtësimin e manovrimit për tifozët dhe krijimin e kushteve sa më të përshtatshme”.

Ky është një lajm i mirë edhe për shqiptarët, teksa Kombëtarja kuqezi është shumë pranë realizimit të ëndrrës për t’u kualifikuar për herë të dytë për në fazën finale të një Evropiani.

Madje tashmë kanë nisur edhe prenotimet e tifozëve shqiptarë për të garantuar një biletë dhe mbështetur nga afër kombëtaren në Europianin e vitit të ardhshëm. Për t’i ardhur në ndihmë ka menduar edhe UEFA, e cila do lejojë ata qytetarë që kanë një biletë për në stadium për të udhëtuar falas në transportin publik gjerman.

Marrëveshja nënkupton që çdo mbajtës i biletës së ndeshjes do të ketë të drejtën e një karte udhëtimi 36-orëshe për ta përdorur në transportin publik në dhjetë qytetet pritëse pa kosto shtesë nga ora 06:00 e ditës përkatëse të ndeshjes deri në orën 18:00 të ditës tjetër. Tifozët do të jenë në gjendje të udhëtojnë në mënyrë të qëndrueshme duke përdorur transportin publik pa pasur nevojë të blejnë ndonjë biletë shtesë.

Në varësi të qytetit pritës, kompania gjermane e udhëtimit publik pret që rreth 70% e tifozëve të përdorin transportin publik kur udhëtojnë për të shkuar dhe u larguar nga stadiumi. Karta e udhëtimit do të përfshijë transportin publik në të dhjetë qytetet pritëse dhe zonat përreth. /rtsh/