Superliga e basketbollit vjen me derbin Sigal Prishtina-Bashkimi

Fundjava do të sjellë ndeshje interesante në xhiron e pestë të Superligës së Kosovës në basketboll.

Sfida kryesore pritet të zhvillohet mes Sigal Prishtinës dhe Bashkimit, ku të dy skuadrat numërojnë nga tri fitore dhe një humbje. Dy skuadrat kanë traditë në basketbollin e Kosovës dhe sfidat mes tyre gjithmonë kanë qenë interesante dhe kështu pritet edhe të dielën.

Ndërkohë, ndeshja e parë e kësaj xhiro është ndërmjet Proton Cable Prizrenit dhe Trepçës. Prizrenasit kanë një fitore e tri humbje, ndërsa e kundërta është me mitrovicasit që kanë tri fitore e një humbje.

Vëllaznimi është skuadra e vetme në elitë që nuk di për fitore, kurse këtë xhiro e pret Golden Eagle Yllin, që po ashtu nuk e ka nisur mirë edicionin e ri, me një fitore e tri humbje.

Java e pestë do të mbyllet me ndeshjen mes Pejës dhe Istogut. Pejanët janë skuadra e vetme me katër fitore në elitën e basketbollit, derisa istogasit kanë një fitore e tri humbje.

Superliga / Java e Pestë

Të shtunën takohen:

17:00 Proton Cable Prizreni – Trepça

19:00 Vëllaznimi – Golden Eagle Ylli

Të dielën takohen:

16:00 Sigal Prishtina – Bashkimi

20:30 Peja – Istogu