Napoli në ankth, lëndimi i Osimhen është serioz

Një lajm i keq për Napolin dhe tifozët e saj, ka ardhur të martën në ambientet e kampionëve në fuqi të Italisë.

Ylli i “napolitanëve”, Viktor Osimhen ka pësuar lëndim serioz gjatë ndeshjes Nigeri-Arabi Saudite.

Sipas medieve italiane, ylli nigerian i është nënshtruar kontrolleve mjekësore, të cilat kanë evidentuar një tërheqje gjysmë gradë të muskulit në bicepsin femoral të kofshës së djathtë.

Osimhen ka nisur terapitë për një rikuperim të shpejtë në “Konami Training Senter”.

Ndonëse ende nuk dihet se sa kohë lojtari do të qëndrojë jashtë fushës së blertë, megjithatë, thuhet se sulmuesi nigerian do të humb pesë ndeshje, tri në Serie A, me Veronën, Milanin dhe Salernitanën, por Osimhen me shumë mundësi do të mungojë edhe ndaj Union Berlinit, ndeshje kjo që do të luhet në kuadër të Ligës së Kampionëve.

Osimhen padyshim se është lojtari më i mirë në skuadrën e Rudi Garcia-s. Nigeriani në këtë sezon të garave, ka shënuar gjashtë gola.