Dy të vdekur dhe dhjetëra të plagosur pasi anija e Marinës Meksikane përplaset në urën e Bruklinit

Një incident tragjik ndodhi të shtunën në mbrëmje në New York, kur anija stërvitore e Marinës Meksikane, Cuauhtémoc, u përplas me urën e Bruklinit. Si pasojë e përplasjes, dy persona humbën jetën dhe të paktën 22 të tjerë mbetën të plagosur, përfshirë katër në gjendje kritike.

Sipas kryebashkiakut të qytetit, Eric Adams, anija kishte humbur energjinë elektrike pak para momentit të përplasjes, ndërsa po përpiqej të kalonte nën strukturën e urës. Në bord ndodheshin 277 persona, përfshirë ekuipazhin dhe kadetët që ishin pjesë e një misioni ndërkombëtar.

Pamjet e marra nga dëshmitarët tregojnë momentin kur direkët e lartë të anijes goditën pjesën e poshtme të urës.

“Ky ishte një aksident tragjik që nuk duhet të kishte ndodhur. Ne po punojmë ngushtë me autoritetet meksikane për të kuptuar se çfarë shkoi keq”, tha Adams gjatë një konference për shtyp.

Roja Bregdetare dhe shërbimet e emergjencës arritën menjëherë në vendin e ngjarjes për të dhënë ndihmën e parë dhe për të evakuuar të plagosurit.

Anija Cuauhtémoc ishte në një turne stërvitor dhe promovues që përfshinte 22 porte në 15 shtete. Ajo kishte lundruar nga Meksika më 6 prill dhe po vizitonte New York-un si pjesë e ndalesave zyrtare.

Hetimet për ngjarjen janë ende në vijim dhe autoritetet po shqyrtojnë shkaqet e humbjes së energjisë si dhe nëse janë respektuar të gjitha protokollet e sigurisë për lundrimin në afërsi të urave të larta.

Ky incident ka shkaktuar reagime nga të dyja qeveritë, me zyrtarë amerikanë dhe meksikanë që kanë shprehur ngushëllimet për familjet e viktimave dhe kanë premtuar bashkëpunim të plotë për të hedhur dritë mbi ngjarjen, raporton rtsh.