Komandanti i lartë amerikan: Ndihma ushtarake e Kinës dhe Koresë së Veriut për Rusinë, krijon rreziqe në Paqësor

Komandanti i lartë i SHBA-së në Paqësor paralajmëroi senatorët se mbështetja ushtarake që Kina dhe Koreja e Veriut po i japin Rusisë në luftën e saj kundër Ukrainës është një rrezik për sigurinë e rajonit pasi Moska u ofron ndihmë ushtarake të dyjave në këmbim.

Admiral Samuel Paparo, kreu i Komandës Indo-Paqësorit të SHBA-së, i tha Komitetit të Shërbimeve të Armatosura të Senatit se Kina i ka ofruar Rusisë 70% të mjeteve të makinerisë dhe 90% të çipave të trashëguara për të ndihmuar Moskën “të rindërtojë makinën e saj të luftës”.

Në këmbim, tha ai, Kina potencialisht po merr ndihmë në teknologji për nëndetëset e saj.

Senatorët kërkuan më shumë shpjegime nga Paparo dhe gjenerali Xavier Brunson, komandant i Forcave të SHBA-së në Kore, për përparimet e Kinës në rajon, duke përfshirë kërcënimet ndaj Tajvanit. Ata gjithashtu vunë në dyshim praninë ushtarake të SHBA-së në Korenë e Jugut, dhe nëse ajo duhet të mbrohet nga shkurtimet.

Të dy thanë se forca aktuale e SHBA-së atje dhe në të gjithë Indo-Paqësorin është kritike si për diplomacinë në rajon ashtu edhe për sigurinë kombëtare të Amerikës, ndërsa lidhjet midis Rusisë dhe Kinës po rriten. SHBA ka 28.500 forca në Korenë e Jugut.

Paparo tha se Koreja e Veriut po dërgon “mijëra, ndoshta qindra mijëra predha artilerie” dhe mijëra raketa me rreze të shkurtër veprimi në Rusi.

Pritshmëria, tha ai, është që Pheniani të marrë mbrojtjen ajrore dhe mbështetjen e raketave tokë-ajër. “Është një simbiozë transaksionale ku secili shtet përmbush dobësinë e shtetit tjetër për përfitim reciprok të secilit shtet,” tha Paparo.

Brunson tha se Koreja e Veriut ka treguar aftësinë për të dërguar municione dhe trupa në Rusi duke avancuar zhvillimin e aftësive të veta ushtarake, duke përfshirë hipersonin. Pyongrang, tha ai, “mburret me një forcë ushtarake të pajisur nga Rusia, të shtuar dhe të modernizuar prej mbi 1.3 milion personel”.

Përpjekjet e Koresë së Veriut për të zhvilluar armë të avancuara bërthamore dhe raketa balistike “paraqesin një kërcënim të drejtpërdrejtë për atdheun tonë dhe aleatët tanë”, shtoi Paparo.

Koreja e Veriut gjithashtu ka dërguar mijëra ushtarë për të luftuar me rusët kundër Ukrainës. Dhe presidenti ukrainas Volodymyr Zelensky tha të mërkurën se Rusia është duke rekrutuar në mënyrë aktive shtetas kinezë për të luftuar përkrah forcave të saj në luftën në Ukrainë. Ai tha se më shumë se 150 mercenarë të tillë janë tashmë aktivë në betejë me dijeninë e Pekinit. Nga ana e saj Kina e ka quajtur akuzën “deklaratë e papërgjegjshme”. /rtsh/