Kurti: Me ne edhe lëvizim pa viza, edhe nuk lëvizë kufiri në veri

Kabineti qeveritar është mbledhur në takimin e 254 në katër vjet qeverisje, datë kjo që kishte edhe një simbolikë. Katër vjet më parë në po të njëjtën ditë, shefi qeveritar tha se e mbajtën mbledhjen e punës asokohe.

“Prej atëherë jemi takuar të paktën dy herë në muaj në këtë sallë në gjithsejtë 254 mbledhje, përfshirë edhe ato elektronike. Kemi marrë 2257 vendime, secili dhe gjithmonë në të mirë të mirëqenies së qytetarëve, zhvillimit ekonomik e mbrojtjes së interesit shtetëror publik”, tha Kurti.

Ai tha se në mes të këtyre mbledhjeve, janë 1464 ditë nga dita e parë e marrjes së detyrës, punë e cila sipas Kurtit u vlerësua nga qytetarët me 9 shkurt.

“Në ballafaqim me pandeminë, përballë krizave të energjisë dhe inflacionit të shkaktuar nga lufta në Ukrainë. Përkundër pengesave dhe vonesave dëshpëruese me ankesa opozitare në Gjykatën Kushtetuese që bllokuan shumë gjëra, përfshirë edhe atë të çmimeve tavan të produkteve bazike e pavarësisht sulmeve paramilitare e terroriste e përpjekjeve të vazhdueshme të Serbisë për destabilizim, e përmbi zhurmën e madhe të debateve televizive të mbrëmjes, qeveria jonë ka arritur rezultate të jashtëzakonshme”, vijoi fjalimin e tij, Kurti.

Kryeqeveritari renditi disa arritje që ai tha se janë ndër kryesoret në këtë katër vjeçar.

“Liberalizimi i vizave nga BE-ja, Tajlanda, Emiratet e Bashkuara e Tajvani, dhe njohja e pasaportës së Kosovës nga dy shtete mosnjohëse, Spanja dhe Armenia. Me neve edhe lëvizim pa viza në Evropë edhe nuk lëvizë kufiri në veri”, tha tutje ai.

Përmendi faktin që Kosova nga tetori i vitit të shkuar për herë të parë në CEFTA përfaqësohet nga institucionet e shtetit e jo nga UNMIK-u.

Në shëndetësi tha se u bë punë e mirë, derisa përmendi renovimet në klinika.

“Mandatin që na pret e ne mezi e presim, do të vazhdojmë me investime spital pas spitali. Do të ndërtohen 2 spitale të reja e gjashtë poliklinika specialistike. Buxheti për listën e barnave esenciale do ta ngritët deri në 100 milionë euro”, premtoi ai.

Tha se për herë të parë në komunat në veri po paguhet energjia e ka filluar të tatohet edhe tatimi në pronë për herë të parë. “Tabela ilegale e patentë shoferi nuk ka më. Strukturat ilegale janë mbyllur sepse janë të jashtëligjshme, atje tani ka institucione të Republikës që i shërbejnë qytetarëve pa dallim. Vetëm me programin ‘Qeveria për familjet’ i kemi rreth 530 të punësuar në veri nga nacionaliteti serb”, tregoi Kurti.

Tha se për herë të parë pas një kohe të gjatë pati rritje pensionesh e shtesa prej 100 euro tha se pensionistët morën 5 herë gjatë mandatit 4 vjeçar.

“Rreth 70 mijë nëna lehona sërish për herë të parë morën shtesa sikurse 400 mijë fëmijë të Kosovës. Tre herë u rritën pagat në sektorin publik, kurse paga minimale në sektorin privat dy herë. Varfëria është ulur sikurse edhe papunësia”, tha ai.

Kur foli për buxhetin e ushtrisë, tha se në mandatin e ri ushtria do t’i ketë mbi 1 miliard euro. “Do të kemi fabrikë të municionit e dronët ‘Made in Kosova’ që i prodhojmë vetë. Kemi filluar të blejmë dhe do të fillojmë edhe të prodhojmë atë që kemi nisur ta blejmë. Tregun energjetik e kemi bashkuar me Shqipërinë, e Shqipërinë e kemi bërë partnere kryesore tregtare në rajon. Me SHBA kemi zgjeruar dhe thelluar marrëdhëniet në fushën e energjisë  e mbrojtjes. Grantin më të madh ndonjëherë nga SHBA-ja e ka fituar qeveria jonë. Nga bashkëpunimi në fushën e mbrojtjes kemi blerë sistemin anti- raketor ‘Javelin’ dhe do të blejmë edhe helikopterët ‘Skifterët e zinj’, nënvizoi ai.

Kurti tha se javën e kaluar bënë një hap jashtëzakonisht të rëndësishëm për sigurinë dhe paqen në rajon duke nënshkruar deklaratën trepalëshe me Republikën e Shqipërisë e Kroacinë. /rtk/