Bayern përmbys Stuttgart dhe bën një hap tjetër drejt titullit

Bayern Munich ka shënuar një fitore të tjetër ndaj Stuttgart, duke triumfuar 3-1 në një ndeshje ku e ka përmbysur rezultatin për t`u shkëputur përkohësisht me njëmbëdhjetë pikë në krye të Bundesliga.

Kjo fitore, e nënta në dhjetë ndeshjet e fundit, ka ardhur në një ditë të veçantë për klubin bavarez, që ka festuar 125-vjetorin e themelimit.

Stuttgart, pavarësisht formës së dobët së fundmi, e ka nisur më mirë ndeshjen. Një pasim i gjatë i portierit, Alexander Nubel, i ka dhënë mundësinë Josha Vagnoman të shënojë, por tentativa e tij është ndalur nga Manuel Neuer. Vendasit kanë vazhduar të sulmojnë, duke rrezikuar me anë të Nick Woltemade.

Dominimi i Stuttgart është shpërblyer në minutën e tridhjetë e shtatë, kur Angelo Stiller ka goditur fort nga distanca, duke çuar topin në trekëndësh dhe duke kaluar ekipin e tij në epërsi.

Megjithatë, Bayern ka arritur të barazojë në kohën shtesë të pjesës së parë. Leroy Sane ka asistuar për Michael Olise, i cili ka shënuar me një goditje të saktë, duke e çuar skuadrën e tij në pushim me një rezultat më të favorshëm.

Në pjesën e dytë, Bayerni e ka marrë plotësisht kontrollin e lojës. Një gabim në mbrojtjen e Stuttgart i ka dhënë mundësinë Leon Goretzka të realizojë golin e dytë për bavarezët, pas një pasimi të gabuar të Nubel.

Stuttgart ka tentuar ta gjente barazimin në minutat e fundit, por një tjetër gabim i Vagnoman i ka dhënë mundësinë Kingsley Coman të shënojë golin e tretë, duke vulosur fitoren e Bayern.

Kjo ka qenë humbja e tretë radhazi në shtëpi për Stuttgart, një statistikë që nuk regjistrohej që nga viti 2022.

Nga ana tjetër, Bayern ka treguar edhe një herë progresin nën drejtimin e Vincent Kompany, duke kaluar një pengesë që sezonin e kaluar i kishte kushtuar shumë në garën për titull.

Me këtë fitore, bavarezët vazhdojnë të konfirmojnë superioritetin e tyre në Bundesliga, duke u bërë skuadra me më shumë gola të shënuar pas njëzet e katër ndeshjeve të para në historinë e kampionatit gjerman.