Bolton: Me Trumpin mund të ketë njohje Kosovë-Serbi – korrigjimi i kufijve i mundur

Ish-këshilltari i presidentit Donald Trump, John Bolton, ka thënë se marrëveshja përfundimtare mes Kosovës dhe Serbisë, duke e përfshirë edhe njohjen reciproke, është e mundshme në mandatin e ri të Trumpit.

Në një intervistë për “A2cnn”, Bolton foli për rikthimin e Donald Trumpit në pushtet, qasjen që do të ketë ndaj rajonit dhe Kosovës në veçanti, gatishmërinë e tij për të çuar drejt një zgjidhjeje përfundimtare mes Kosovës dhe Serbisë, apo mundësinë e rikthimit të idesë së korrigjimit të kufijve në tryezë.

“Mendoj se kjo është e mundur. Nëse ai do ta shihte këtë si diçka nga e cila mund të marrë merita, mendoj se do t’i kushtonte vëmendje menjëherë. Ky është një problem shumë kompleks, dhe kjo zakonisht nuk e tërheq atë, por mendoj se do të tërhiqet nga çështjet e sigurisë në Evropën Lindore në përgjithësi për shkak të luftës në Ukrainë”, u shpreh ndër të tjera Bolton.