Guvernatori Ismaili takon drejtues të lartë të FMN-së, BB-së dhe guvernatorë të bankave qendrore evropiane

Guvernatori i Bankës Qendrore të Republikës së Kosovës (BQK), Ahmet Ismaili ka zhvilluar takime të ndara me drejtues të lartë të Fondit Monetar Ndërkombëtar (FMN), Bankës Botërore (BB) dhe guvernatorë të bankave qendrore të vendeve evropiane.

Këto takime, guvernatori Ismaili i bërë në kuadër të mikpritjes së tij për 25-vjetorin e themelimit të BQK-së, me të cilën zhvilloi punimet Konferenca Ndërkombëtare “Ndërtimi i urave përtej kufijve, ndërtimi i ardhmërive: Integrimi në SEPA për gjithpërfshirje financiare – fuqizimi i rritjes dhe reziliencës”.

Gjatë tri ditëve të organizimit për nderë të 25-vjetorit, guvernatori Ismaili në ambientet e BQK-së ka takuar Alfred Kammer, drejtor i Departamentit Evropian në FMN, Asad Alam, drejtorin Rajonal për Evropën dhe Azinë Qendrore, Rritje të Drejtë, Financa dhe Institucione nga Grupi i Bankës Botërore, pasuar nga guvernatori i Bankës Kombëtare të Austrisë, Robert Holzmann, guvernatori i Bankës Qendrore të Islandës, Asgeir Jonsson, guvernatori i Bankës Qendrore të Estonisë, Madis Müller dhe Gediminas Simkus, guvernator dhe kryesues i Bordit të Bankës së Lituanisë.

Gjatë këtyre takimeve, krahas falënderimeve për mbështetjen dhe pjesëmarrjen në organizimin e BQK-së, Guvernatori i BQK-së i ka informuar të pranishmit mbi zhvillimet aktuale në sektorin financiar, duke nënvizuar stabilitetin dhe qëndrueshmërinë e sistemit financiar, duke vënë në pah performancën e qëndrueshme të sektorit, përfshirë normën e ulët të kredive jo-performuese dhe nivelin e lartë të kapitalizimit.

Po ashtu, i pari i BQK-së shprehu mirënjohjen e thellë ndaj partnerëve dhe institucioneve ndërkombëtare në avancimin e kornizës ligjore dhe rregullative, qeverisjen korporative dhe infrastrukturën tjetër financiare.

Ai gjithashtu vlerësoi bashkëpunimin me bankat qendrore partnere, duke e falënderuar shtetet dhe popullin e tyre, për mbështetjen e dhënë nga institucionet e tyre, me të cilën BQK-ja ka bashkëpunim të shkëlqyer në aspekt të asistencës teknike dhe ngritjen e kapaciteteve institucionale.

Tutje, në takim u theksua rëndësia e këtyre partneriteteve në ruajtjen e stabilitetit ekonomik dhe rritjen e qëndrueshmërisë së sistemit financiar të vendit tonë për të mirën e të gjithë qytetarëve. Prandaj, edhe konferenca e organizuar kishte tematika të tilla aktuale dhe relevante. U diskutua për vizionin strategjik, planin pesëvjeçar, iniciativat që kanë për synim përmirësimin e qëndrueshmërisë së sektorit financiar, avancimin e rregulloreve dhe promovimin e gjithëpërfshirjes financiare si dhe sfidat që na presin.

Takimi rikonfirmoi përkushtimin e palëve për të forcuar bashkëpunimin, ndërtuar komunikim efektiv për të ndarë përvojat, për të promovuar rritjen e qëndrueshme financiare, duke siguruar që sektori financiar të vazhdojë të zhvillohet në përputhje me standardet ndërkombëtare në funksion të ekonomisë dhe vendit.