Aksidenti mes trenit dhe veturës në Pejë, vdes gruaja që kishte pësuar lëndime

Ka humbur jetën gruaja e cila kishte pësuar lëndime të rënda në një aksident të ndodhur më 2 nëntor 2024 në fshatin Pavlan të Pejës.

Policia ka njoftuar se ekipi mjekësor ka konfirmuar vdekjen e viktimës, e cila ishte njëra nga tre personat që u lënduan në përplasjen mes trenit dhe një veture.

Policia e Kosovës ishte njoftuar për aksidentin rreth orës 10:05 të mëngjesit të 2 nëntorit, kur një veturë dhe treni ishin përplasur.

Tre të lënduarit ishin dërguan menjëherë për trajtim mjekësor në spitalin rajonal të Pejës, dhe viktima tashmë e ndjerë, për shkak të natyrës së lëndimeve, u dërgua në Qendrën Klinike Universitare të Kosovës (QKUK) në Prishtinë.

Sipas njoftimit të Policisë, viktima ka ndërruar jetë pas disa ditësh luftë për jetën.