“Duhej të isha larguar më herët nga Reali”, Isco: Nga Bernabeu pres duartrokitje

Në përpjekje për të rimëkëmbur karrierën e tij, Isco Alarcon firmosi këtë verë me Real Betis. Dhe në fakt, fantazisti ka marrë mjaftueshëm minuta në këtë fillim të sezonit duke dhënë sinjale pozitive.

Megjithatë, edhe pse tashmë është pjesë e një realiteti të ri, sërish Isco nuk harron ish-skuadrën e tij për dhjetë vite, Real Madrid. 31-vjeçari shprehet se do të duhej të ishte larguar më herët nga madrilenët, ndërsa theksoi se në momentin kur të rikthehet në Bernabeu pret që publiku t’i dhurojë duartrokitje.

“Nuk mendoj se Reali më ka trajtuar në një mënyrë jo korrekte gjatë këtyre viteve, edhe pse besoj se ndoshta duhej të më kishin dhuruar më shumë minuta në fushë. Futbolli është një sport me të cilin duhet të dish të përshtatesh në çdo situatë. Kur të rikthehem në Bernabeu, pres që tifozët të më duartrokasin. Los Blancos janë klubi më i rëndësishëm në karrierën time”, u shpreh Isco.