Rami Hadar jep dorëheqje nga Kombëtarja e Kosovës

Rami Hadar ka dhënë dorëheqje për arsye personale si përzgjedhës i Kosovës A te meshkujt.

Hadar ishte emëruar përzgjedhës i Kosovës në maj të vitit 2023.

“Ai udhëhoqi Dardanët në parakualifikimet e Eurobasket 2025, në përballjet me Zvicrën dhe Danimarkën, duke pasur dy fitore dhe dy humbje. Kosova shënoi dy fitore ndaj Zvicrës, si dhe pësoi nga Danimarka. Gjithashtu Hadar ishte trajner i Kosovës në dy ndeshjet parakualifikuese për Kupën e Botës 2027, ku Kosova fitoi ndaj Irlandës dhe pësoi nga Azerbajxhani. Hadar ka falënderuar të gjithë për bashkëpunimin, duke ju dëshiruar suksese në të ardhmen. Bordi i Federatës së Basketbollit të Kosovës (FBK) ka pranuar dorëheqjen e tij”, thuhet në njoftimin e FBK-së.

FBK sipas këtij njoftimi, falënderon trajnerin Rami Hadar për angazhimin e tij dhe i dëshiron suksese në karrierë.

Federata e Basketbollit e Kosovës ka filluar negociatat me trajnerë potencial për të udhëhequr Dardanët, ku përzgjedhësi i ri pritet të emërohet shumë shpejt.

Ndërkohë, ndeshjet e ardhshme për Dardanët janë në muajin nëntor, kundër Zvicrës dhe Irlandës për parakualifikimet e Kupës së Botës 2027.