Izraeli: Tani kemi nën kontroll Rafahun në Gazën jugore

Izraeli ka mposhtur brigadën e Hamasit në Rafah në Rripin jugor të Gazës, deklaroi sot ministri i Mbrojtjes Yoav Gallant gjatë një vizite në zonën kufitare midis Gazës dhe Egjiptit.

“Brigada e Hamasit në Rafah është mposhtur dhe mbi 150 tunele janë shkatërruar në rajon”, tha ai.

Ai udhëzoi trupat të përqendroheshin në shkatërrimin e tuneleve të mbetura në kufirin midis brezit bregdetar dhe Egjiptit në periudhën e ardhshme.

Izraeli kishte avancuar në Rafah në maj, pavarësisht kritikave masive ndërkombëtare, në mënyrë që të shkatërronte forcat e mbetura të organizatës terroriste islamike palestineze atje.

Trupat izraelite pushtuan gjithashtu pikën kufitare të Rafahut në Egjipt, e njohur si Korridori i Filadelfit. Kjo zonë 14 kilometra e gjatë konsiderohet si një nga pikat më të mëdha të mosmarrëveshjes në negociatat për armëpushimin në Gazë.

Hamasi kërkon tërheqjen e plotë të Izraelit nga Rripi i Gazës. Nga ana tjetër, kryeministri izraelit Benjamin Netanyahu këmbëngul se Izraeli duhet të vazhdojë të kontrollojë korridorin edhe pas armëpushimit, në mënyrë që të parandalohet kontrabanda e armëve, raporton atsh.