Shqipëri, 10 vatra zjarri aktive

Gjatë 24 orëve të fundit janë evidentuar 44 vatra zjarri në vend, nga të cilat 34 janë shuar, ndërsa 10 vatra mbeten ende aktive.

Ministria e Mbrojtjes tha se në disa nga vatra ku ndërhyrja nga toka është e pamundur është ndërhyrë nga ajri përmes ekipit rumun që ka ardhur në mbështetje të Shqipërisë për shuarjen e vatrave të zjarrit.

Konkretisht vijojnë të jenë aktive, por pa rrezikuar banesat, vatrat e zjarrit në malin e Tomorrit, malin e Thatë në Prespë, bjeshkët e Bollotekut dhe malin e Tërnovës në Bulqizë.

Sipas Ministrisë së Mbrojtjes për izolimin dhe shuarjen e plotë të vatrave të zjarrit janë angazhuar 275 forca zjarrfikëse, 219 forca ushtarake, 44 efektive nga policia e shtetit, 161 struktura të emergjencës civile të pushtetit lokal, 52 nga administrata e zonave të mbrojtura, 54 shërbimi pyjor, si dhe 98 vullnetarë.

“Vlerësojmë punën e bërë deri tani nga bashkitë e prekura nga zjarret dhe u kërkojmë të angazhohen maksimalisht, të informojnë publikun dhe komunitetin e rrezikuar, të sigurojnë funksionimin e sistemit të monitorimit, të paralajmërimit të hershëm, të njoftimit dhe të alarmit në territorin e tyre si dhe të  informojnë në kohë Prefektin e Qarkut dhe Agjencinë Kombëtare të Mbrojtjes Civile lidhur me situatat e zjarreve. I ftojmë gjithashtu të bashkëpunojnë me bashkitë fqinje,  duke  angazhuar  kapacitetet  në përballimin e zjarreve.

U kërkojmë autoriteteve lokale, në zbatim të ligjit, të mbajnë në gatishmëri strukturat e sistemit të mbrojtjes civile si dhe të aktivizojnë kapacitetet e subjekteve publike e private për përballimin dhe lehtësimin e  situatës nga zjarret”, tha Ministria e Mbrojtjes. /rtsh