Presidenti Ademi uron Ferizajn për rikthimin në Superligë

Presidenti i Federatës së Futbollit të Kosovës Agim Ademi e ka uruar Ferizajn për rikthimin në Superligën e Kosovës.

Vetëm një vit pasi ra në Ligën e Parë, Ferizaj e ka fituar Ligën e Parë – Grupi B për t’u rikthyer në elitë.

Ndër urimet e shumta, s’ka munguar as i presidenti të FFK-së, i cili e uroi klubin për suksesin.

“Urime FC Ferizaj rikthimi në AlbiMall Superligë!

Titulli i kampionit në Raiffeisen Ligën e Parë – Grupi B është një sukses i merituar pas një edicioni të jashtëzakonshëm për klubin tuaj.

Me punën tuaj profesionale, organizimin e mirë, përkushtimin e gjithsecilit në klub dhe mbështetjen e tifozëve arritët që brenda një viti të riktheheni në elitë.

Përgëzoj drejtuesit e klubit, stafin, futbollistët, tifozët “Ujqit” dhe të gjithë qytetarët ferizajas për këtë sukses. Uroj që në edicionin e ardhshëm me paraqitjet tuaja t’i jepni hijeshi Superligës dhe të kontribuoni në rritjen e mëtejme të nivelit të futbollit në vendin tonë.

Mirë se u riktheve në Superligë! Urime Ferizaj!”.