Trajneri i Rubinit vlerëson Dakun: Paraqitjet e tij flasin qartë

Rubin Kazan mori një fitore të rëndësishme 2-0 në Shën Petersburg përballë Zenitit, që kryeson kampionatin rus.

Pa diskutim që protagonisti i suksesit në “Gazprom Arena” ishte sulmuesi shqiptar Mirlind Daku, autor i një goli dhe një asisti.

Në konferencën për shtyp pas ndeshjes trajneri i Rubinit, Rashid Rakhimov ka vlerësuar lojën e sulmuesit kuqezi.

“E shihni vetë se si është Daku. Nuk dua ta lavdëroj, por sot ishte me të vërtetë një ndeshje shumë e mirë. E lavdërova tani dhe ai thotë: “Faleminderit Zot, të paktën një herë më ke thënë fjalë të mira”. I thashë se nesër do të dëgjonte diçka ndryshe”, ka thënë Rakhimov.

Mirlind Daku po paraqitet shumë mirë në kampionatin rus, ku në 23 ndeshje të luajtura me Rubinin ka shënuar 6 gola dhe ka dhënë 4 asiste.

Sulmuesi shpreson që me paraqitjet e tij të bindë trajnerin Sylvinho, që ta grumbullojë në Euro 2024.