Flamuri i Kosovës më lartë se ai i Serbisë, “çmenden” mediat serbe

Të dielën në Podgoricë ka përfunduar Kampionatin Ballkanik në karate.

Të shtunën, garuesja e Kosovës, Alma Loki, fitoi medaljen e artë në kata. Në finale ajo u vlerësua më lartë se garuesja e Serbisë, Neda Milosheviq.

Kjo bëri që në ceremoninë e ndarjes së medaljeve, flamuri i Kosovës të jetë përkrah atij të Serbisë, por më lartë.

Kjo pamje, që u shpërnda shumë, nuk u ka pëlqyer mediave në Serbi.

“Pse nuk e ndaloni këtë turp vëllezër malazezë?! Flamuri i Serbisë dhe ai i shtetit të rrejshëm të Kosovës njëri përkrah tjetrit”, ka shkruar sajti antishqiptar “sd.rs”.

Ka pasur komente në Serbi që garuesja Milosheviq është dashur të largohet nga podiumi. Të tjerë e kanë vlerësuar normale pamjen.

Vlerësime si “skenë e pabesueshme”, “skenë e rrallë” “e pakuptimtë” “turpërim” janë paraqitur në media të shumta serbe.