Macron ndalon protestat e paligjshme në Francë, ashpërsohen masat pas trazirave

Presidenti francez, Emmanuel Macron, ka paralajmëruar ndalimin e protestave që organizohen nga grupe pa autoritet të njohur, ndërsa autoritetet franceze po përpiqen të frenojnë valën e trazirave që ka përfshirë vendin pas demonstratave kundër rritjes së kostos së jetesës.

Sipas raportimit të The Guardian, Macron deklaroi se tubimet e organizuara nga organizata të njohura, përfshirë sindikatat, mund të zhvillohen, por autoritetet mund t’u ndryshojnë itinerarin për të mbrojtur bizneset dhe ndërtesat publike nga dëmtimet e mundshme. (Studentë protestues në Paris, të enjten, pasi një gjykatë rrëzoi ndalimin fillestar të policisë ndaj demonstratës së tyre. Foto: Ibrahim Ezzat/Anadolu/Getty Images).

“Prioriteti është rikthimi i qetësisë”, u shpreh presidenti francez, i cili njoftoi gjithashtu se do të zhvillojë një mbledhje të Këshillit të Mbrojtjes për të përcaktuar masat e mëtejshme për protestat e planifikuara në ditët në vijim.

Macron fajësoi grupet e së majtës ekstreme për dhunën e shpërthyer gjatë demonstratave të së shtunës, më 17 tetor, duke i akuzuar për veprime që synojnë rrëzimin e Republikës. Protestat, të cilat fillimisht u nxitën nga problemet në sistemin arsimor, u zgjeruan më pas për shkak të pakënaqësisë ndaj rritjes së kostos së jetesës.

Përplasjet me policinë, vandalizmi dhe grabitjet shkaktuan dëme të mëdha në disa qytete franceze. Në Lion, sipas raportimeve, u plaçkitën nga 200 deri në 300 dyqane, ndërsa një zyrë turistike u dogj. Autoritetet kanë vendosur kufizime për tubimet dhe masa të tjera sigurie në disa qytete, përfshirë Lionin, Marsejën, Nicën dhe Tulonin.

Në Paris, autoritetet lejuan zhvillimin e një marshimi në pjesën lindore të kryeqytetit, nga sheshi Bastille, por ndaluan kalimin e tij drejt qendrës së qytetit. Ndërkohë, një protestë studentore e planifikuar për të enjten u zhvillua pasi një gjykatë rrëzoi vendimin fillestar të policisë për ndalimin e saj.

Masat e reja kanë hapur debat mbi kufijtë e ndërhyrjes së autoriteteve dhe të drejtën për të protestuar. Përfaqësues të studentëve kanë kundërshtuar përpjekjet për të dalluar protestuesit që konsiderohen të pranueshëm nga ata që autoritetet i cilësojnë si të paligjshëm, duke paralajmëruar se kufizimet mund të cenojnë lirinë e tubimit.

Qeveria franceze po përgatitet për një tjetër valë demonstratash, ndërsa tensionet sociale dhe pakënaqësia për koston e jetesës vazhdojnë të rriten, rreth gjashtë muaj përpara zgjedhjeve presidenciale të vitit 2027. /rtsh/