Shkëlqejnë Yamal dhe Raphinha, Barcelona shkatërron Rayo Vallecanon

Barcelona ka vazhduar serinë perfekte në LaLiga, duke regjistruar fitoren e tretë në po aq ndeshje pas triumfit spektakolar 5-2 ndaj Rayo Vallecanos në Camp Nou.

Skuadra e Hansi Flickut e nisi ndeshjen në disavantazh, por reagoi shpejt dhe në fund siguroi tri pikë, duke regjistruar një tjetër paraqitje të fuqishme para tifozëve të saj. Për Barcelonën kjo ishte edhe fitorja e 21-të radhazi në shtëpi në kampionat.

Rayo Vallecano befasoi vendasit në minutën e 12-të. Álvaro García depërtoi në krahun e majtë dhe asistoi për Sergio Camellon, i cili me një goditje të fuqishme e dërgoi topin në këndin e sipërm të portës.

Barça reagoi menjëherë. Raphinha fillimisht u ndal nga portieri Daniel Cárdenas, por braziliani nuk vonoi të gjente rrjetën. Pas një pasimi të Xavi Espart, Raphinha depërtoi në zonë dhe e kaloi portierin për ta barazuar rezultatin.

Vendasit vazhduan presionin dhe në minutën e 34-të përmbysën rezultatin. Marc Bernal rikuperoi topin dhe gjeti Lamine Yamal, i cili u fut në zonë dhe me të majtën realizoi për 2-1, duke shënuar golin e tij të parë në sezonin 2026/27.

Barcelona pati mundësi të tjera për të thelluar epërsinë, ndërsa goli i Jules Koundés në fund të pjesës së parë u anulua për pozicion jashtë loje.

Në pjesën e dytë, Barça e nisi furishëm dhe në minutën e 51-të realizoi edhe golin e tretë. Dani Olmo dha një pasim të bukur për Anthony Gordonin, ndërsa Florian Lejeune, në përpjekje për të larguar topin, e dërgoi atë në portën e tij.

Rayo nuk u dorëzua dhe vetëm pak minuta më vonë Camello shënoi golin e dytë personal, duke ngushtuar rezultatin në 3-2.

Mysafirët patën edhe një mundësi të artë për barazim, por ndërhyrja vendimtare e Pau Cubarsít shpëtoi Barcelonën.

Në minutat e fundit, Barcelona riktheu kontrollin e plotë. Raphinha realizoi golin e dytë personal dhe të katërtin për katalanasit, ndërsa në fund Lamine Yamal vulosi fitoren me golin e tij të dytë në ndeshje.

Me këtë sukses, Barcelona mbetet me pikë të plota pas tri javësh në LaLiga. Ndërkohë, Rayo Vallecano ka vetëm një pikë në tri ndeshjet e para të sezonit.

Barcelona gjithashtu ka kaluar tashmë një sezon të plotë, prej 38 ndeshjesh, pa barazim në kampionat: 32 fitore dhe gjashtë humbje. /Rekordi.net