Gjermania vendos rekord të ri golash, Brazili bie në vendin e dytë

Gjermania ka hyrë në histori të Kupës së Botës 2026 duke u bërë kombëtarja me më shumë gola të shënuar në finalet e këtij turneu, duke kaluar Brazilin në renditjen e përgjithshme.

Fitorja bindëse 7-1 ndaj Kurasao-s në “Houston Stadium” solli një arritje të madhe statistikore për “Die Mannschaft”, të cilët tashmë kanë arritur në 239 gola të shënuar në historinë e Botërorëve. Me këtë shifër, Gjermania ka lënë pas Brazilin që mbetet në kuotën e 238 golave.

Rezultati i ndeshjes rikujtoi një tjetër moment historik të dhimbshëm për Brazilin, humbjen 7-1 ndaj Gjermanisë në “Mineirao” në vitin 2014, duke shtuar edhe më shumë simbolikën e këtij rekordi të ri.

Pas Gjermanisë dhe Brazilit, në listën e përfaqësueseve më të suksesshme për nga golat e shënuar në Botëror renditen Argjentina me 152 gola, Franca me 136 dhe Italia me 128.

Një tjetër detaj interesant lidhet me numrin e lojtarëve që kanë kontribuar në këto gola. Brazili ka shënuar 238 golat e tij me 85 lojtarë të ndryshëm, ndërsa Gjermania ka arritur 239 gola me 84 futbollistë, duke treguar një efikasitet të lartë në repartin ofensiv.

Në ndeshjen ndaj Kurasao-s, disa lojtarë gjermanë shënuan për herë të parë në Kupën e Botës, përfshirë Nmecha, Musiala, Broën dhe Undav, duke thelluar edhe më shumë dominimin e tyre në këtë përballje.

Ky sukses e forcon pozicionin e Gjermanisë si një nga kombëtaret më produktive në historinë e turneut, ndërsa Brazili tashmë duhet të përballet me presionin e humbjes së një tjetër rekordi historik në këtë edicion.