Rakitic: Ndjesë tifozëve, nuk dorëzohem derisa të rikthej Sevillan ku e ka vendin

Pavarësisht se në përbërje ka lojtarë me eksperiencë të madhe dhe plot kualitet, Sevilla vazhdon të jetë në krizë rezultatesh.

Humbja 0-3 përballë Getafes solli shkarkimin e trajnerit Diego Alonso. Vetëm dy muaj pasi zëvendësoi Mendilibar.

Skuadra andaluziane u eliminua nga Champions League si vendi i fundit në grup, ndërkohë që në La Liga renditet e treta nga fundi.

Në lidhje me situatën e vështirë te Sevilla ka folur Ivan Rakitic.

“Ndihem keq, të gjithë në dhomat e zhveshjes ndihen keq. Ne që e duam stemën e Sevillas po e vuajmë këtë moment të vështirë, unë i pari.

U kërkoj falje njerëzve tanë, tifozëve dhe të gjithë atyre që na mbështetin në çdo moment. Ndjesë, por u premtoj se do të punojmë më shumë se kurrë.

Ky është momenti më i vështirë, më i trishtë dhe më i komplikuar në karrierën time. Por nuk dorëzohem derisa ta kthej Sevillan aty ku e meriton”, theksoi mesfushori kroat.